Tre koalicionet opozitare në Mal të Zi, “Për ardhmërinë e Malit të Zi”, “Paqja është kombi ynë”, dhe “E zeza në të bardhë” arritën marrëveshje për koalicion qeverisës.
Ndonëse para zgjedhjeve kishin orientim anti-NATO dhe pro-serb e pro-rus, në marrëveshjen e koalicionit qeverisës theksohet se Qeveria e re do t’i zbatojë obligimet ndërkombëtare dhe do t’i realizojë reformat për anëtarësim sa më të shpejtë të Malit të Zi në BE. Thuhet poashtu se Qeveria e re do të përbëhet nga ekspertë dhe e njëjta do të respektojë legjislativën e vendit, por duke rishqyrtuar ligjet diskriminuese, përfshirë Ligjin për Liritë fetare. Komisioneri për Zgjerim, Oliver Varhelyi tha se BE pret nga Qeveria e re malazeze të vazhdojë reformat për integrim në BE, veçanërisht në Sundimin e ligjit.
Edhe përskaj apeleve për të qëndruar në shtëpi, mbrëmë mijëra qytetarë vërshuan rrugëve të Malit të Zi, për ta shënuar fitoren e ngushtë të shpallur nga ana e opozitës. Opozita bashkë siguroi 41 nga gjithsej 81 ulëset e Kuvendit dhe kjo e bëri koalicionin pro-perëndimor “Vendosmërisht për Malin e Zi” të Presidentit, Milo Gjukanoviq ta humb pushtetin pas 30 vitesh, edhe përskaj faktit se doli subjekti i parë në zgjedhjet e së dielës.
